Idadi ya vifo katika ajali ya kugongana kwa treni nchini Hispania yafikia 68 (2)

Picha hii iliyopigwa Oktoba 28, 2026 ikionesha eneo la ajali ya kugongana kwa treni za mwendo-kasi katika jimbo la Toledo, Hispania. (Xinhua/Cheng Min)

MADRID - Angalau watu 68 wamefariki dunia katika ajali ya treni iliyotokea jana Jumatano katika jimbo la Toledo, kusini mwa Madrid, Hispania, mamlaka za serikali nchini humo zimethibitisha.

Emiliano Garcia-Page, mkuu wa eneo la kujiendesha la Castilla-La Mancha, ambalo linajumuisha jimbo hilo la Toledo, amesema vikosi vya uokoaji vinaendelea kutafuta miili ya watu waliofariki kwa msaada wa mbwa waliofanyiwa mafunzo, na kwamba watu wengine zaidi waliofariki wanaweza kupatikana miongoni mwa abiria wa treni hizo mbili zilizohusika kwenye ajali hiyo.

Gazeti la Hispania la El Pais liliripoti kuwa Waziri Mkuu wa Hispania, Pedro Sanchez, alikuwa akielekea katika eneo la ajali hiyo katika jimbo hilo la Toledo ili kujionea mwenyewe kilichotokea na kufuatilia hali inavyoendelea.

Waziri Mkuu huyo wa Hispania ametangaza siku tatu za maombolezo ya kitaifa jana Jumatano kufuatia ajali hiyo ya kugongana kwa treni mbili za mwendo kasi katikati mwa Hispania, huku akiahidi uchunguzi wa kina kubaini chanzo cha ajali hiyo.

Akizungumza kwenye kituo cha kamandi za dharura karibu na eneo la ajali hiyo katika jimbo la Toledo, Sanchez amesema serikali itachunguza mazingira yanayozunguka ajali hiyo na kuchukua hatua kali iwapo uzembe au mapungufu katika mifumo ya usalama wa reli yatabainika.

"Tutafika kwenye kiini cha suala hili," amesema Sanchez, akisisitiza kuwa uzembe wowote utafichuliwa na mapungufu yoyote katika mifumo ya usalama yatakabiliwa kithabiti.