Kesi za Ebola nchini DRC zafikia 8,000 huku WHO ikionya mlipuko bado unapanuka

Idadi ya kesi za Ebola zilizothibitishwa nchini Jamhuri ya Kidemokrasia ya Kongo (DRC) imefikia 8,000, mamlaka za afya za DRC zilisema jana Jumatatu huku Shirika la Afya Duniani (WHO) likionya kuwa mlipuko huo bado ni mkubwa, unapanuka kijiografia na una maambukizi yanayozidi kuongezeka.

Kwa mujibu wa ripoti mpya ya serikali ya DRC, hadi Jumamosi, nchi hiyo ilikuwa imerekodi kesi 8,067 zilizothibitishwa, zikiwemo vifo 3,901, huku kiwango cha vifo kikiwa ni asilimia 48.4. Ripoti hiyo inaonesha kuwa wagonjwa 2,070 wamepona, na hadi kufikia siku hiyo ya Jumamosi mlipuko huo ulikuwa umeathiri sehemu 63 katika mikoa saba.

Katika taarifa yake ya hivi punde zaidi ya mlipuko iliyochapishwa Ijumaa, WHO imesema kupanuka kijiografia kwa ugonjwa huo, ikiwemo katika maeneo mapya yaliyoathiriwa katika Sud-Ubangi na Haut-Uele, kumeongeza hatari ya maambukizi ya kuvuka mipaka ya nchi.

Tangu mlipuko huo wa Ebola ulipotangazwa mwezi Mei, umeenea na kuwa mkubwa na ulioua watu wengi zaidi kuwahi kurekodiwa nchini DRC, na mlipuko wa pili wa Ebola kwa ukubwa duniani, baada ya mlipuko wa 2014-2016 wa Afrika Magharibi.