WFP yakabiliwa na uhaba wa fedha wakati ukosefu wa usalama na mabadiliko ya tabianchi vikizidisha mahitaji ya kibinadamu nchini Ethiopia

Shirika la Mpango wa Chakula Duniani la Umoja wa Mataifa (WFP) limeonya kuhusu kuongezeka kwa changamoto za mazingira ya asili na zile zinazosababishwa na binadamu nchini Ethiopia wakati uhaba mkubwa wa fedha ukitatiza operesheni zake za misaada.

Katika taarifa yake kuhusu taifa la Ethiopia ya jana Jumatatu, Shirika hilo limesema nchi hiyo inaendeleza ajenda ya mageuzi makubwa ya kiuchumi yanayolenga kufungua ukuaji wa muda mrefu na kuimarisha mwelekeo wake wa maendeleo.

Hata hivyo, ripoti hiyo imesisitiza kuwa, licha ya mageuzi hayo, mfumuko wa bei wa kudumu muda mrefu, pamoja na ukosefu wa usalama, wakimbizi wa ndani na mishtuko inayotokana na mabadiliko ya tabianchi, “vinaendelea kumomonyoa uwezo wa kaya kuhimili hali na kuongeza wasiwasi kuhusu usalama wa chakula.”

Wakati huohuo, WFP imeonya kuwa, uhaba mkubwa wa fedha unazuia operesheni zake za kuokoa maisha, kwani ni asilimia 46 tu ya mahitaji ya fedha ya nchi hiyo ndiyo imepatikana kwa ajili ya kipindi cha Oktoba 2026 hadi Machi 2027, hali ambayo imeacha pengo la mahitaji ya dola za kimarekani milioni 251.