Idadi ya abiria wa treni ya SGR nchini Kenya yaongezeka kwa asilimia 10.3 katika nusu ya kwanza ya mwaka 2026

Takwimu za awali zilizotolewa na shirika la taifa la takwimu, zinaonesha kuwa idadi ya abiria wanaotumia Reli ya Kisasa (SGR) nchini Kenya iliongezeka kwa takriban asilimia 10.3 katika nusu ya kwanza ya mwaka 2026, ikichochewa na ongezeko la mahitaji ya huduma hiyo.

Ofisi ya Taifa ya Takwimu ya Kenya (KNBS) iliripoti Jumanne kuwa idadi ya abiria ilipanda na kufikia takriban milioni 1.31 hadi mwishoni mwa mwezi Juni, ikilinganishwa na takriban milioni 1.19 iliyorekodiwa katika kipindi kama hicho mwaka 2025.

Kwa mujibu wa KNBS, idadi ya abiria iliendelea kuongezeka licha ya nauli kupanda kwa asilimia 50 kuanzia mwezi Januari 2024, ambapo wasafiri wa ndani na watalii wa kimataifa wanaoelekea jijini Mombasa wameendelea kutanguliza kasi na urahisi wa usafiri.

Kwa upande wa usafirishaji wa mizigo, kiasi cha mizigo iliyosafirishwa na SGR kilifikia takriban tani milioni 4.1 katika nusu ya kwanza ya mwaka 2026, kutoka takriban tani milioni 3.56 zilizorekodiwa katika kipindi kama hicho mwaka 2025, zikiingiza mapato ya takriban dola za Marekani milioni 70.9 katika kipindi hicho cha miezi sita, ikilinganishwa na takriban dola milioni 68.1 katika nusu ya kwanza ya mwaka 2025.